70 अल - मआरिज (The ways of Ascent)
*आरंभ अल्लाहच्या नावाने जो अत्यंत दयाळू व कृपाळू आहे.
1 त्या अटळ शिक्षेविषयी शंका घेणाऱ्याने ती (लवकर) यावी म्हणून मागणी केली. 2 सत्य नाकारणाऱ्या लोकांपासून तिला कोणीही दूर सारू शकत नाही. 3 जेव्हा ती अल्लाहकडून येईल, जो सदैव उंच असणाऱ्या प्रमुख स्थानांचा मालक आहे. 4 त्याच्याकडे स्वर्गदूत व जिब्रील (प्रमुख स्वर्गदूतांपैकी एक)(दररोज) चढून जात असतात. जो दिवस (म्हणजे पृथ्वीवरील) पन्नास हजार वर्षांचा असल्याप्रमाणे असतो. 5 (श्रद्धावंतांनो!) तुम्ही सहनशीलतेचा अंगीकार करा, ---- सकारात्मक सहनशीलतेचा. 6 लोकांना (न्यायाचा दिवस) फार दूर असल्याचे वाटते. 7 पण आम्ही त्यास फार जवळ असल्याचे पाहत आहोत. 8 त्या दिवशी आकाश वितळलेल्या तांब्यासारखे (लाल) होईल. 9 आणि पर्वत लोकरीच्या पिंजलेल्या पुंजक्याप्रमाणे होईल. 10 आणि कोणीही मित्र आपल्या मित्राविषयी विचारपूस (देखील) करणार नाही. 11 जरी ते एकमेकांना समोर पाहतील (तरीही कोणी कोणाला विचारणार नसेल), तेव्हा अपराधी माणसामध्ये (एका प्रकारची व्यर्थ) इच्छा जागृत होईल की, त्या दिवसाच्या शिक्षेपासून सर्वांचे बळी देऊनही स्वतःची सुटका होणार असेल तर ती व्हावी. (जसे) त्याची स्वतःची मुले, 12 त्याची पत्नी व त्याचा भाऊ, 13 आणि त्याचे सर्व कुटुंबीय, जे त्याला नेहमी आधार द्यायचे. आणि 14 पृथ्वीवरील सर्व लोकांनाही 'मुक्तिदंड' म्हणून देऊन केवळ आपली सुटका करून घ्यावी.
15 पण नाही ! त्याच्यासाठी तर नरकाची धगधगती आग तयार असेल. 16 जी त्याच्या त्वचा सोलून काढील. 17 त्या सर्वांना ती स्वतःकडे बोलावील, ज्यांनी (सत्यापासून) पाठ फिरविली आणि (त्यापासून ) दूर निघून गेले. 18 ज्याने (भरपूर) संपत्ती गोळा केली व (स्वतःभोवतीच) तिचा संचय करून ठेवत होता. 19 खरोखर, माणूस उतावीळ स्वभावासह जन्माला आलेला आहे. 20 जेव्हा त्याला कष्ट पोहोचते, तेव्हा तो शोक करू लागतो. 21आणि जेव्हा तो सुस्थितीत असतो, तेव्हा तो कंजूषपणाचे वर्तन करतो. 22 पण असे न करणारे ते आहेत, जे नमाजा च्या माध्यमातून अल्लाहकडे वळलेले आहेत. 23 जे नित्य नमाजाचे पालन करतात. 24 तसेच जे आपल्या संपत्तीतून योग्य तो हिस्सा (दानकार्यात) देतात. 25 मागणाऱ्या गरजू लोकांना आणि (न मागणाऱ्या) गरजू लोकांना. 26 जे न्यायाच्या दिवसावर दृढ विश्वास ठेवतात. 27आणि जे आपल्या पालनकर्त्याच्या शिक्षेचे भय बाळगून असतात. 28 (आणि) होय, कोणालाही आपल्या पालनकर्त्याच्या शिक्षेपासून निर्धास्त होता कामा नये. 29 आणि जे आपले चारित्र्य कलंकित होऊ नये म्हणून नेहमी दक्ष असतात.30 पण त्यांच्या पत्नी व (विवाहबंधनात दाखल झालेल्या)दासी, यांच्याबाबतीत काही आक्षेपार्ह नाही. 31 पण जे मर्यादांच्या पलीकडे जाऊ पाहतात. तर असेच लोक (अल्लाहच्या नजरेत) मर्यादांचे उल्लंघन करणारे लोक आहेत. 32 आणि जे आपली विश्वासार्हता व आपल्या वचनांप्रति (पूर्णपणे) दक्ष असतात. 33 आणि जे सत्याची साक्ष देण्याच्या बाबतीत दृढनिश्चयी असतात. 34 तसेच जे नियमितपणे नमाजरुपी प्रार्थना करीत असतात. 35 यांनाच (सर्वसुखसंपन्न) अशा स्वर्गात सन्मानाचे जीवन लाभेल.
36 पण या सत्य नाकारणाऱ्यांना काय झाले आहे की, ते तुमच्याकडे धावत येत आहेत.... 37 उजव्या बाजूने आणि डाव्या बाजूने व गटातटाने? 38 त्यांच्यापैकी प्रत्येकजण, अशी अपेक्षा बाळगून आहे का की , त्याला सर्वसुखसंपन्न अशा स्वर्गात प्रवेश दिला जाईल ? 39 नाही, कदापि नाही, आम्ही त्यांना अशा गोष्टीपासून निर्माण केलेले आहे, जी त्यांना ठाऊक आहे.
40 कदापि नाही! मी सूर्योदयाच्या व सूर्यास्ताच्या सर्व स्थानांचा मालक असलेल्या (अल्लाहची) शपथ घेऊन सांगतो, आम्ही यासाठी समर्थ आहोत की, 41 त्यांच्याजागी त्यांच्यापेक्षाही उत्तम लोकांना आणू शकतो. आणि असे करण्यापासून आम्हाला रोखू शकेल असा कोणीही नाही. 42 तर त्यांना तोपर्यंत व्यर्थ बडबड करीत व शब्दांचा खेळ खेळत राहू द्या, जेव्हा ते त्या दिवसाला सामोरे जातील, ज्याचे त्यांना वचन दिले गेलेले आहे. 43 ज्या दिवशी ते आपल्या कबरींतून घाईघाईने बाहेर पडतील आणि (जमा होण्याच्या ठिकाणी) असे धावत सुटतील जणू एका खांबाकडे धावण्याची शर्यतच करीत आहेत. 44 त्यांच्या नजरा जमिनीवर खिळलेल्या असतील, शरमेने त्यांचे चेहरे ग्रस्त असतील. हाच तो दिवस आहे, ज्याचे त्यांना वचन देण्यात आलेले होते.
==============================
अनुवादक - अब्दुर-रहमान चाऊस, नांदेड
टिप्पण्या