76 अद-दहर
*आरंभ अल्लाहच्या नावाने जो अत्यंत दयाळू व कृपाळू आहे.
1 मनुष्यावर एक अशी वेळ आलेली नाही का, जेव्हा तो वर्णन करण्यास योग्य असा नव्हता? 2 आम्ही मनुष्याला एक मिश्रित अशा वीर्यबिंदूने निर्माण केले. आणि त्याची परीक्षा पाहण्यासाठी आम्ही त्याला ऐकणारा व पाहणारा बनविले. 3 आम्हीच त्याला मार्ग दाखवला आहे. आता स्वतःला कृतज्ञ किंवा कृतघ्न त्याला सिद्ध करून दाखवायचे आहे. 4 आम्ही सत्य नाकारणाऱ्या कृतघ्न लोकांसाठी साखळदंड, गळ्यात घालावयाची लोखंडी कडी आणि नरकाची धगधगती आग तयार ठेवलेली आहे. 5 याउलट सच्चे सदाचरणी लोक असे प्याले पितील, ज्यात कापूराचा थंडावा जाणवेल. 6 हा एक असा स्रोत आहे, ज्यातून अल्लाहचे भक्त पितील. आणि हवे तिकडे (त्याच्या शाखा काढून) त्यास प्रवाहित करतील. 7 (खरे सदाचरणी ते आहेत,) जे आपल्या वचनपूर्तीच्या बाबतीत फार दक्ष असतात. आणि त्या दिवसाचे भय बाळगतात, ज्याचे संकट सर्वदूर पसरलेले असेल. 8 आणि ते ( केवळ अल्लाहच्या प्रसन्नतेसाठी ) स्वतः गरजवंत असूनही (इतर) गरजवंत, अनाथ व कैदी यांना खाऊ घालतात. 9 (म्हणतात) 'आम्ही केवळ अल्लाहच्या प्रसन्नतेसाठी तुम्हाला खाऊ घालत असतो. आम्हाला तुमच्याकडून ना काही मोबदला हवा आहे, ना तुमचे आभार. 10 त्या भयानक दिवशी आमच्या पालनकर्त्याकडून होणाऱ्या निर्णयाचे आम्हाला भय वाटते.' 11 आणि म्हणून अल्लाह त्या दिवसाच्या संकटापासून त्यांचे रक्षण करेल. आणि त्यांना चैतन्य व सुख प्रदान करेल. 12 आणि त्यांच्या सहनशीलतेच्या मोबदल्यात त्यांना स्वर्ग व रेशमी कपडे प्रदान करेल. 13 ते तिथे भव्य आसनांवर लोड लावून पहुडलेले असतील. तिथे त्यांना ना उन्हाळ्याचा त्रास होईल, ना हिवाळ्याचा. 14 स्वर्गातील वृक्षांच्या आनंददायी सावल्या त्यांच्यावर पसरलेल्या असतील आणि फळांचे गुच्छ हाताला सहज येतील (अशा पद्धतीने तिथे उपलब्ध असतील). 15 (ईश्वरीय प्रसादांनी भरलेली) चांदीची पात्रे व काचेचे प्याले त्यांच्यादरम्यान फिरविले जातील. 16 काचेसारखे दिसणारे प्याले, चांदीचेच असतील. योग्य प्रमाणात ते भरलेले असतील.
17 (याशिवाय) त्यांना तिथे सुंठीचे फ्लेव्हर असलेले (मद्याचे) प्याले पिण्यास देण्यात येतील. 18 स्वर्गात (अशा पेयाचा) एक वाहता झरा आहे, ज्याचे नाव सल्सबील आहे. आणि त्यांच्या सेवेत अशी (सुंदर) मुले नेहमी तत्पर असतील, जे नेहमी तशीच मुले राहतील. तुम्ही त्यांना पाहाल, तर तुम्हाला वाटेल की, ते सर्वत्र विखुरलेले जणू मोतीच आहेत. 20 स्वर्गात तुम्ही जिथे-कुठे पाहाल सर्वत्र तुम्हाला सुख समृद्धी आणि महान राजेशाही थाट दिसून येईल. 21 स्वर्गनिवासी तिथे तलम हिरव्या रेशमाची कपडे परिधान करतील आणि कशिदा काढलेली वस्त्रे. आणि त्यांना चांदीची कडी घालण्यात येतील आणि त्यांचा पालनकर्ता त्यांना शुद्ध पेय पिण्यासाठी देईल. 22 (त्यांना सांगितले जाईल) 'हा तुमचा मोबदला आहे. आणि तुमच्या प्रयत्नांना (अल्लाहची) स्वीकृती मिळाली आहे.'
23 (पैगंबर!) आम्ही (हे) कुराण तुमच्याकडे थोडे-थोडे करून प्रकट केलेले आहे. 24 म्हणून तुम्ही आपल्या पालनकर्त्याच्या आदेशाची संयमपूर्वक प्रतीक्षा करा. आणि त्यांच्यापैकी कोणाचेही म्हणणे मान्य करू नका, जो पापी व कृतघ्न आहे. 25 आणि सकाळी व संध्याकाळी (वेगवेगळ्या प्रसंगी) आपल्या पालनकर्त्याचे स्तुतिगान करा. 26 आणि रात्रीच्या समयीदेखील त्याच्यासमोर (नमाजात) नतमस्तक व्हा. आणि रात्रीच्या एका मोठ्या भागात त्याचे स्तुतिगान करा. 27 हे लोक (जे अल्लाहविषयी गाफील आहेत), ताबडतोब प्राप्त होणाऱ्या फायद्यांची अभिलाषा बाळगतात. आणि (त्यांच्याशी अटळरित्या सामना होणाऱ्या) भयंकर दिवसाकडे, ते दुर्लक्ष करून आहेत. 28 आम्हीच त्यांना निर्माण केलेले आहे. आणि त्यांच्या अवयवांची सुदृढ अशी रचना आम्हीच केलेली आहे. आणि आम्ही इच्छिले तर त्यांच्याजागी त्यांच्याचसारख्या इतरांना आणू शकतो. 29 हा एक उपदेशग्रन्थ आहे. तेव्हा ज्याची इच्छा असेल, त्याने आपल्या पालनकर्त्याकडे जाणाऱ्या मार्गाचा अवलंब करावा. 30 पण तोपर्यंत अल्लाह (तुम्हाला तो मार्ग दाखवू) इच्छित नाही, तोपर्यंत तुम्हीही तशी इच्छा करू शकत नाही. अल्लाह सर्व काही जाणणारा आहे, बुद्धिमान आहे. 31 तो इच्छितो त्यास आपल्या कृपाछ्त्रात प्रवेश देतो. आणि अत्याचारी लोकांसाठी त्याने कठोर शिक्षा तयार ठेवलेली आहे.
----------------------------------------------------------------------------
अनुवादक-अब्दुर-रहमान चाऊस,
टिप्पण्या