77 अल - मुरसलात (Those sent forth)
*आरंभ अल्लाहच्या नावाने जो अत्यंत दयाळू व कृपाळू आहे. 1 त्या वाऱ्यांची शपथ जे एका मागून एक पाठविले जातात. 2 आणि मग ते वादळाची गती धारण करतात. 3 आणि जे (पाऊस वर्षिणाऱ्या) ढगांना दूरवर पसरवितात. 4 मग त्यांना एकमेकांपासून वेगळे करतात. 5 (त्यांची) शपथ जे आपल्याबरोबर (अल्लाहकडून) उपदेश (ग्रंथ) घेऊन येतात. 6 काहींसाठी क्षमा तर काहींसाठी सावधानतेचा इशारा. 7 ज्या गोष्टीचे तुम्हाला वचन दिले जात आहे, ती निश्चितपणे घटित होणार आहे.
8 (ती घटना तेव्हा घटित होईल ) जेव्हा तारे निस्तेज होऊन जातील. 9 आणि जेव्हा आकाश फाटून जाईल. 10 आणि जेव्हा पर्वत धुळीप्रमाणे विखुरले जातील. 11 आणि जेव्हा निर्धारित समयी पैगंबरांना एकत्र आणले जाईल. 12 या सर्व गोष्टी कोणत्या दिवसासाठी टाळल्या जात होत्या. 13 न्यायाच्या दिवसासाठी. 14 आणि तुम्हाला काय माहीत की, न्यायाचा दिवस म्हणजे आहे तरी काय? 15 सत्याला असत्या ठरविणारे, नाश पावणार आहेत, त्या दिवशी. 16 आम्ही आधीच्या (अपराध्यांना) नष्ट केले नाही का? 17 आणि आम्ही त्यांच्या नंतरच्या (अपराध्यांनाही) त्यांच्या पाठोपाठ (विनाशाच्या खाईत) जायला लावू. 18 कारण आम्ही अपराध्यांसोबत असाच व्यवहार करीत असतो. 19 सत्याला असत्य ठरविणारे नाश पावणार आहेत, त्या दिवशी.
20 (लोकांनो !) आम्ही तुम्हास एका तुच्छ वीर्यबिंदूपासून निर्माण केलेले नाही का? 21 मग त्यास एका सुरक्षित ठिकाणी ठेवले, (म्हणजेच गर्भाशयात). 22 एका निर्धारित मुदतीपर्यंत. 23 अशाप्रकारे आम्ही (गर्भाच्या) वाढीचे टप्पे निश्चित केले. होय ! आम्ही किती कुशल रचनाकार आहोत ! 24 सत्याला असत्य ठरविणारे नाश पावणार आहेत, त्या (न्यायाच्या) दिवशी. 25 आम्ही पृथ्वीला (भरपूर गोष्टी) स्वतःमध्ये सामावून ठेवणारी बनविलेले नाही का? 26 जीवितांसाठी आणि मृतांसाठी. 27 आणि तिच्यावर आम्ही उंच पर्वत उभे केले. आणि तुम्हाला पिण्यासाठी गोड पाण्याची व्यवस्था केली. 28 सत्याला असत्या ठरविण्याचे (कुकृत्य) केलेले लोक नाश पावणार आहेत, त्या दिवशी.
29 (त्या दिवशी त्यांना सांगितले जाईल), 'चला आता त्या गोष्टीकडे (म्हणजेच नरकाच्या आगीकडे) जिला तुम्ही खोटे ठरवीत असत. 30 चला त्या (आगीच्या) सावलीकडे जिचे तीन भाग आहेत (तीन कॉलम आहेत.)' 31 जी ना छाया देणारी आहे, ना ज्वालेपासून रक्षण करणारी आहे. 32 त्या सावलीतून महालाएवढ्या उंचच्या उंच ठिणग्या फेकल्या जातील. 33 (त्या उसळणाऱ्या ठिणग्या अशा दिसतील) जणू पिवळ्या उंटांचा (कळप) आहे. 34 सत्याला असत्य ठरविणारे नाश पावणार आहेत, त्या दिवशी. 35 हा असा दिवस आहे जेव्हा लोक अवाक झालेले असतील. 36 आणि त्यांना सबबी सादर करण्याची परवानगी दिली जाणार नाही. 37 सत्याला असत्य ठरवीत राहिलेले लोक, (न्यायाच्या) दिवशी नाश पावणार आहेत. 38 (तेव्हा सांगितले जाईल) हा फैसल्याचा दिवस होय. आम्ही तुम्हाला व तुमच्या पूर्वीच्या सर्व लोकांना एकत्रित केलेले आहे. 39 जर तुमच्याकडे काही युक्ती असेल तर ती माझ्याविरुद्ध (आता) लढवा. 40 नाश पावणार आहेत, सत्य नाकारणारे, त्या दिवशी.
41 (याउलट) (अल्लाहकडे जाब देण्याची) जाण ठेवून होते, ते लोक (आनंददायी) सावल्या व पाण्याचे (नयनरम्य) झरे यांच्या सान्निध्यात असतील. 42 त्यांना हवी असतील, ती फळे (उपलब्ध असतील). 43 (सांगितले जाईल,) 'खा व प्या व मजा करा, त्या कृत्यांच्या बक्षीसाप्रीत्यर्थ, जी तुम्ही करीत असत. 44 आम्ही सदाचरणी लोकांना अशाप्रकारे बक्षीस देत असतो.' 45 सत्य नाकारणारे नाश पावणार आहेत, त्या दिवशी. 46 (पापी लोकांनो!) खा आणि चार दिवस मौज करून घ्या (पृथ्वीतलावर). निःसंदेह ! तुम्ही पापी आहात ! 47 पण सत्य नाकारण्यावर आग्रही राहिलेले लोक नाश पावणार, त्या दिवशी. 48 जेव्हा त्यांना सांगितले जाते की, (अल्लाहसमोर) नमन करा, तर ते तसे करीत नाहीत. 49 सत्य नाकारण्यावर आग्रही राहिलेले लोक नाश पावणार आहेत, त्या दिवशी, 50 (अल्लाहचा सुरक्षित ग्रंथ असलेल्या) या कुराणाशिवाय ते अन्य कशावर विश्वास ठेवणारे बनतील?
----------------------------------------------------------------------------
अनुवादक-अब्दुर रहमान चाऊस, नांदेड
टिप्पण्या