83 अल - मुतफफिफिन
*आरंभ अल्लाहच्या नावाने जो अत्यंत दयाळू व कृपाळू आहे.
1 नाश पावणार आहेत ते, जे कमी माप देतात. 2 जे स्वतःसाठी घेताना पुरेपूर माप घेतात. 3 पण इतरांना मापून किंवा वजन करून देतांना कमी देतात. 4 अशा लोकांना या गोष्टीची जाणीव नाही का की, त्यांना उठवून उभे केले जाणार आहे? 5 (जाब देण्यासाठी) एका भयंकर दिवशी. 6 ज्या दिवशी संपूर्ण मानवजात, सर्वांचा मालक असलेल्या (अल्लाहसमोर) उभी राहील? 7 खरोखर, दुष्ट लोकांच्या कृत्यांचा रेकॉर्ड सिज्जीनमध्ये असेल. 8 आणि तुम्हाला काय माहीत, 'सिज्जीन ' काय आहे? 9 ते लिहून ठेवलेले महारेकॉर्ड आहे. 10 सत्य नाकारणारे नाश पावणार आहेत, त्या दिवशी. 11 जे न्यायाच्या दिवसाला खोटे ठरवितात. 12 त्यास तोच ठरवितो जो मर्यादांचे उल्लंघन करणारा पापी आहे. 13 जेव्हा त्याला आमचे संदेश ऐकविले जातात, तेव्हा तो म्हणतो, 'या केवळ आधीच्या लोकांच्या कहाण्या आहेत.' 14 नव्हे ! वस्तुस्थिती ही आहे की, त्यांच्या दुष्कृत्यांचा, त्यांच्या हृदयावर गंज चढलेला आहे. 15 निश्चितपणे ! त्या दिवशी त्यांना त्यांच्या पालनकर्त्यापासून दूर ठेवले जाईल (ते पालनकर्त्याला पाहू शकणार नाहीत). 16 मग ते नरकाच्या आगीत प्रवेश करतील. 17 आणि त्यांना सांगितले जाईल, 'हाच तो (नरक) आहे, ज्यास तुम्ही खोटे ठरवीत होता.'
18 पण सदाचारी लोकांचा रेकॉर्ड इल्लिय्यीनमध्ये सुरक्षित ठेवलेला आहे. 19 आणि इल्लिय्यीन म्हणजे काय? हे तुम्हाला कसे कळणार? 20 तो एक महारेकॉर्ड आहे. 21 तो रेकॉर्ड अल्लाहच्या सर्वात नजीक असलेल्या स्वर्गदूतांच्या निगराणीत आहे. 22 निःसंदेह, सदाचारी लोक सर्वसुखसंपन्न (अशा स्वर्गात) असतील. 23 (शाही) आसनांवर बसून (अल्लाहच्या सामर्थ्याच्या सर्वत्र झळकत असलेल्या खुणा) पाहत असतील. 24 त्यांच्या चेहऱ्यांवर (खऱ्या अर्थाने) प्रसन्नता असल्याचे तुम्हाला जाणवेल. 25 त्यांना सीलबंद शुध्द् मद्यार्क पिण्यासाठी दिले जाईल. 26 ज्याच्या सील मधून कस्तुरीचे सुगंध येत असेल, या त्या गोष्टी आहेत ज्याची इच्छुकांनी इच्छा बाळगायला हवी. 27 आणि त्या पेयात तसनीमचे मिश्रण असेल. 28 (तसनीम हा स्वर्गातील) एक असा झरा ज्यातून अल्लाहचे सान्निध्य लाभलेले लोक पितील. 29 जे लोक अपराधी होते, ते श्रद्धावंतांची खिल्ली उडवायचे. 30 आणि त्यांच्या जवळून जाताना ते एक-दुसऱ्याकडे पाहून डोळे मिचकावीत असत. 31 आणि जेव्हा ते आपल्या लोकांकडे परत येत, तेव्हा ते (त्या ईशभिरु लोकांविषयी ) मस्करी करीत परत येत असत. 32 आणि जेव्हा ते त्यांना पाहत असत, तेव्हा ते तिरस्काराने असे म्हणायचे, 'हे वाट चुकलेले लोक आहेत.' 33 वास्तविक पाहता, यांना श्रद्धावंतांवर रखवालदार म्हणून पाठविण्यात आलेले नव्हते. 34 पण आज (न्यायाच्या दिवशी) श्रद्धावंत लोक त्या सत्य नाकारणाऱ्या लोकांवर हसतील. 35 शाही आसनांवर बसून (श्रद्धाहीनांची काय दशा झाली,) ते पाहत असतील. 36 (म्हणतील,) 'सत्य नाकारणाऱ्यांना त्यांच्या कृत्यांचा पुरेपूर बदला मिळाला ना !'
=============================================
टिप्पण्या