81 अत- तकवीर
*आरंभ अल्लाहच्या नावाने जो अत्यंत दयाळू व कृपाळू आहे.
1 जेव्हा सूर्य गुंडाळून टाकला जाईल. 2 आणि जेव्हा तारे तेजशून्य होतील. 3 आणि जेव्हा पर्वतांना चालविले जाईल. 4 आणि जेव्हा दहा महिन्यांचा गर्भ असलेल्या उंटिणी मोकाट सोडून दिल्या जातील. 5 जेव्हा जंगली जनावरांना एकत्र आणले जाईल. 6 आणि जेव्हा (सुनामीप्रमाणे) समुद्र खवळतील. 7 जेव्हा सर्व लोकांची (त्यांच्या कृत्यांनुसार) विविध गटांत विभागणी केली जाईल. 8 आणि जेव्हा जिवंत गाडल्या गेलेल्या तान्ह्या मुलीला विचारले जाईल. 9 कोणत्या अपराधापोटी तिला मारून टाकण्यात आले? 10 आणि जेव्हा लोकांचे कर्मपत्र उघडले जातील. 11 जेव्हा आकाशाचे आवरण खेचून त्यास उघडे केले जाईल. 12 आणि जेव्हा नरकाची आग भडकविली जाईल. 13 जेव्हा स्वर्ग जवळ आणले जाईल. 14 तेव्हा प्रत्येकाला नीट कळून जाईल की, त्याने स्वतःसाठी काय तयार केलेले आहे.
15 मी मागे हटणाऱ्या ताऱ्यांना साक्ष ठेवतो. 16 त्या ग्रहांनाही जे आपल्या कक्षेत फिरतात व अस्त पावतात. 17 आणि त्या रात्रीचीही (शपथ) जी सरत असते. 18 आणि त्या पहाटेची, जेव्हा ती उदय पावते ( मी या सर्व गोष्टींची शपथ घेऊन, म्हणजे त्यांना साक्षी बनवून सांगतो). 19 की, हे कुराण एका आदरणीय पैगंबराकडे प्रकट केलेली ईश्वरवाणी होय. 20 सामर्थ्यशाली असा, सृष्टीच्या महासिंहासनावर आरूढ असलेल्या अल्लाहकडे सन्माननीय असा (ग्रंथ). 21 तेथे त्याच्या आज्ञेचे पालन केले जाते. आणि तो विश्वासपात्र आहे. 22 (मक्केतील लोकांनो !) तुमचा( हा ) साथी वेडा नाही. 23 पैगंबराने (हा ग्रंथ अल्लाहकडून आणणाऱ्या स्वर्गदूताला ) खुल्या क्षितिजावर पाहिले, हे सत्य आहे. 24 कोणाचीही बुद्धी जिथे पोचू शकत नाही अशा अदृश्य गोष्टी जाणण्यासाठी तो (पैगंबर) काही हपापलेला नाही. 25 हे कुराण काही शापित सैतानाची वाणी नाही (तर शुद्ध ' अल्लाहची वाणी' आहे.) 26 मग तुम्ही लोक कुठे (भटकत) जात आहात ? 27 हा केवळ उपदेशपर संदेश आहे, समस्त मानवजातीसाठी. 28 तुमच्यामधील त्या प्रत्येक माणसासाठी जो सरळ मार्गांचा अवलंब करू इच्छितो. 29 पण तुम्ही तोपर्यंत त्या गोष्टीची इच्छा करू शकत नाही, जोपर्यंत सर्व जगांचा पालनकर्ता असलेला अल्लाह ती इच्छित नाही.
================================
अनुवादक- अब्दुर -रहमान चाऊस, नांदेड.
टिप्पण्या