80 अबस
*आरंभ अल्लाहच्या नावाने जो अत्यंत दयाळू व कृपाळू आहे.
1(पैगंबराने) एवढ्यावरून कपाळाला आठ्या घातल्या व तोंड फिरविले. 2 की, एक आंधळा माणूस त्यांच्याकडे आला. 3 (पैगंबर !) तुम्हाला काय माहीत की, कदाचित (ईश्वरीय संदेश ग्रहण करून) तो सुधारू शकला असता, 4 किंवा त्याने उपदेश ऐकले असते, तर ते त्याच्यासाठी लाभदायी ठरू शकले असते. 5 जो मनुष्य (उपदेशांप्रति) अनास्था दाखवत होता. 6 तुम्ही मात्र त्याच्याकडे लक्ष देण्याच्या बाबतीत उत्सुक होता. 7 त्याने जर स्वतःची सुधारणा केली नाही, तर त्याबद्दल तुमच्यावर काही दोष येणार नाही. 8 पण जो मनुष्य तुमच्याकडे धावत येतो, (उपदेश ग्रहण करण्याच्या) उत्सुकतेसह. 9 आणि तो अल्लाहप्रति आदरयुक्त भय बाळगणारा आहे. 10 तुम्ही अशा माणसाकडे दुर्लक्ष करता. 11 निश्चितच हे (कुराण) एक बोधग्रंथ आहे. 12 तर हवे त्याने (यापासून) बोध ग्रहण करावे. 13 जो अशा पृष्ठांवर नमूद आहे, जी अर्थातच आदरास पात्र आहेत. 14 जी उच्चा दर्जाची व पवित्र आहेत. 15 अशा लिहिणाऱ्यांच्या हाती. 16 जे सन्माननीय व सदाचारी आहेत.
17 नाश पावो माणूस ! किती कृतघ्न आहे तो! 18 (अल्लाहने) त्यास कशापासून निर्माण केले ? 19 वीर्याच्या एका बिंदूपासून ! त्यास तो निर्माण करतो आणि त्याची स्वभाववैशिष्टे निश्चित करतो. 20 आणि त्याच्यासाठी (जीवनाचा)मार्ग सुकर करतो. 21 आणि शेवटी त्यास मृत्यू देऊन कबरीत पोचवतो. 22 आणि मग जेव्हा तो इच्छिल त्यास पुन्हा जिवंत करून उभा करेल. 23 तरीही माणूस त्याच्या आदेशांनुसार कृती करण्यास नकार देतो (जो माणसाचा सर्वप्रकारे कर्ताकरविता आहे. 24 माणसाने आपल्या अन्नाकडे पाहावे (ते त्याला कसे उपलब्ध करून दिले जाते, त्यावर त्याने चिंतन करावे.) 25 आम्ही कसे मोठ्या प्रमाणावर पाण्याचा वर्षाव करतो ). 26 आणि मग आम्ही जमिनीला फाडून (नवीन वनस्पती निर्माण करतो). 27 मग आम्ही तिच्यातून धान्य उगवितो. 28 आणि द्राक्षे व भाजीपाला. 29 आणि जैतून व खजूर. 30 आणि घनदाट बागा. 31आणि फळे व चारा. 32 तुमच्या व तुमच्या गुराढोरांसाठी उपजिविकेचे साधन म्हणून.
33 जेव्हा कान बहिरे करणारा प्रचंड आवाज होईल. 34 (तो पुनरुत्थानाचा दिवस असेल) ज्या दिवशी मनुष्य आपल्या भावापासून दूर पळेल. 35 आणि आपल्या आई -वडिलांपासून आणि 36 आपली पत्नी व मुले यांच्यापासून. 37 त्या दिवशी प्रत्येक जण स्वतःचीच अशी चिंता करीत असेल की, दुसऱ्याकडे लक्ष देण्याचा विचार त्याच्या मनात येणार नाही. 38 काही चेहरे त्या दिवशी प्रफुल्लित असतील. 39 हसत असतील, आनंद साजरा करीत असतील. 40 आणि त्या दिवशी काही चेहरे धुळीने माखलेले असतील. 41 त्यांच्यावर उदासीनता पसरलेली असेल. 42 हेच लोक सत्य नाकारणारे दुराचारी होते.
===========================
अनुवादक -अब्दुर रहमान चाऊस, नांदेड
टिप्पण्या